Inanunsyar ni South Korean President Lee Jae Myung kan nakalihis na Biyernes na liwat ipapautob an nagkapirang kasunduang militar sa border kan South Korea asin North Korea komo parte kan saiyang lakdang tangani mapamarhay an relasyon kan duwang nasyon.
Sa patara-tara kaini para sa ika-80 anibersaryo kan paglaya kan Korea gikan sa pananakop kan Hapon, sinaysay ni Lee na saindang ibabalik an September 19 Comprehensive Military Agreement, sarong kasunduang pigtintaan kan nakalihis na taong 2018 na obhetong pababaon an tensyon sa border sa paagi kan pag-untok sa nagkapirang aktibidad na may kinaraman sa militar.
Marurumduman na naraot an kasunduan makalihis an paglangkaw nin tensyon kan nakalihis na taong 2023, kan ipauntok kan North Korea asin man ni dating South Korean President Yoon Suk Yeol kan Hunyo 2024 makalihis magpadara nin mga lobo kan basura an North Korea sa South Korea.
Kabali sa mga probisyon kan kasunduan an pag-untok kan military drills harani sa border, pagbabawal sa live-fire exercises, pagtatatag nin no-fly zones, asin paghali kan nagkapirang guard posts sa Demilitarized Zone (DMZ).
Dae pa malinaw kun pano masimbag an Pyongyang sa lakdang na ini, orog na ta nagkapirang beses na kaining binatikos an mga naenot na inisyatibo ni Lee para sa katrangkiluhan.
Mientrstanto, pinaburan man ni Lee an “forward-looking” na koneksyon sa Japan basado sa interes kan South Korea.
Nilalaomang mabisita ini sa Tokyo sa Agosto 23 para sa summit kaiba si Japanese Prime Minister Shigeru Ishiba, kasabay kan epekto kan mga taripa gikan sa administrasyon ni U.S. President Donald Trump.
