Inaprubaran na kan South Korea an sarong ley na nagbabawal sa paggamit nin mobile phones asin iba pang digital gadget sa mga klasrum sa bilog na nasyon magpuon sa Marso sa masunod na taon.
Obheto kan ley na simbagan an naglalalang epekto kan labi na paggamit kan mga kaakian sa social media.
Suportado ini kan duwang partido sa parliament kun saen pigsunad an nasambitan ng ley sa tahaw kan pagkahadit sa ”adiction” kan mga jovenes sa social media.
Susog ki Cho Jung-hun, sarong lehislador gikan sa oposisyon asin co-author kan propwesto, kadakol na mga kaakiaan soboot sa nasyon an nagpupuyat gamit an mga platform sa social media siring kan Instagram, kaya man nagigin problema ini sa salud asin man sa saindang pag-aadal.
Basado kaya sa datos kan Education Ministry, 37% kan mga estudyante sa middle asin man high school an nagsabing naaapektaran kan social media an saindang pang uru-aldaw na buhay, mantang 22% man digde an nakakamati nin matinding pagkabalisa kun dae makagamit nin social media.
Bagaman kadakol na eskwelahan sa nasyon an may sadiri nang panundon dapit sa cellphone use, itinatakda kan bagong ley an opisyal na pagpapautob kaini sa bilog na nasyon.
Tutugutan pa man an paggamit nin digital devices para sa mga estudyanteng may kakundian o para sa mga obhetong pang-edukasyon na sana.
Mientrastanto, nagkapirang youth advocacy groups an nagkokontra sa ley, asin sinabing pwedeng balgaron kaini an karapatang pantao kan mga aki