Kinumpirmar kan South Korea kasuodma, Sabado, Agosto 23 na nagpaputok ini nin warning shots sa mga tropang soldados kan North Korea sa may border kan duwang nasyon.
Nangyari an insidente hapon nin Martes, Agosto 19 sa tahaw kan padagos na piggigibong konstruksiyon kan NoKor kan barriers puon pa kan nakalihis na taon tanganing permanenteng masaraduhan an border kaini sa SoKor.
Basado sa local media sa SoKor, sinaysay kan South Korean joint chief of staff na ginibo ninda an nasambitan ng lakdang makalihis na magbalyo an mga soldados kan NoKor sa military demarcation line o marking kan limitasyon o boundaries sa tahaw kan duwang nasyon.
Nag-atras man soboot an mga soldados kan NoKor makalihis sindang magpapautok nin warning shots.
Sigun sa state media, sinaysay ni North Korea Army Lt. Gen Ko Jong Chol na naggamit an military kan Seoul nin machine gun sa pagpapaputok nin labi sa 10 warning shots sa saindang mga soldados.
An pagsasapubliko sa insidente an nataon man sa paghali kan bagong South Korean President na si Lee Jae Myung gikan sa Seoul kasuodma para sa pagbisita sa Japan asin Amerika.
Marurumduman, nabanga an duwang Korea puon pa kan nakalihis na Korean war na nagwakas kan taong-1953.
Mayong nag-iral na peace treaty sa tahaw kan duwa kaya nagtitinir na nasa giyera pa man an mga ini maski pirang taon na man an nakakalihis na dae nagribayan nin pag-atake an NoKor asin SoKor.
