Ibinasura kan South Korea police an reklamong isinampa laban sa aktor na si Kim Soo Hyun katakod kan alegasyon na nakipagrelasyon suboot ini sa nagadan na aktres na si Kim Sae Ron kan menor de edad pa ini.
Segun sa report, nagdesisyon an Seoul Seongdong Police Station na dai na ipagpadagos an kaso huli sa kulang an ebidensya.
An isyu kan akusaran kan pamilya ni Kim Sae Ron an aktor na nagkaigwa sinda nin relasyon mantang menor de edad pa sana an aktres. Lalong nag-init an kontrobersiya pagkatapos magluwas nin mga alegasyon an YouTube channel na HoverLab Inc., laban ki Kim Soo Hyun.
Kan Abril 2025, nagsampa man nin Civil Lawsuit an aktor laban sa pamilya ni Kim Sae Ron asin sa mga operator kan nasabing YouTube channel.
Pinahimutikan ni Kim Soo Hyun an mga akusasyon. Segun saiya, nagkaigwa sinda nin relasyon ni Kim Sae Ron sa laog kan haros sarong taon, alagad nangyari ini kan pareho na sindang nasa hustong edad. Pinahimutikan man kan aktor an mga pahayag na igwa siya nin kinaaraman sa pagkagadan kan aktres.
Binawian nin buhay si Kim Sae Ron kan Pebrero 2025 sa edad na 24. Nabistado siya sa mga pelikulang “A Brand New Life” asin “The Man From Nowhere,” pati na sa mga seryeng “Hi! School Love On,” “Can You Hear My Heart,” asin “The Queen’s Classroom.”Mientrastanto, si Kim Soo Hyun saro sa mga pinakasikat na South Korean actors, na nabistado sa mga hit drama na “Queen of Tears,” “It’s Okay to Not Be Okay,” asin “My Love from the Star.”
