NAGA CITY- Nagbungkaras an engkwentro sa pag-ultanan kan tropa nin gobyerno asin mga rebeldeng New People’s Army (NPA) sa banwaan nin Lupi, Camarines Sur.
Sa pakikipag-olay kan Bombo Radyo Naga ki Capt. Ronnie Madriñan, hale sa 9th Infantry Division, Philippine Army, kinumpirmar kaini an nangyaring engkwentro sa Sitio Dose, Barangay Bagong Sikat sa nasambitang banwaan alas-5:45 nin aga ngonyan na aldaw, Marso 21.
Nakasagupa kan mga soldados hale sa 91st Division Reconnaissance Company an pitong mga rebeldeng NPA mantang nagkokondusir an mga ini nin operasyon tanganing lapagon an mga rebeldeng yaon sa likod kan nangyaring pananambang man sa tolong miyembro kan CAFGU kan nakaaging mga aldaw sa banwaan nin Ragay.
Naghaloy suboot nin sampulong minuto an nangyaring riribayan nin putok sa pag-ultanan nin duwang grupo.
Tulos man na nagdulag an mga rebelde asin narekober sa pinangyarihan kan engkwentro an sarong calibre .45 pistol, mga bala asin manlaen laeng mga gamit.
Nagtutubod man an mga militar na igwang nairido sa lado kan mga rebeldeng NPA huli naman sa nahiling na mga gira nin dugo na nahiling sa nasambitang lugar.
Sa ngonyan, nagpapadagos pa nanggad an ginigibong pursuit operation kan mga militar laban sa mga nagdulag na mga rebelde.
