(UPDATE) NAGA CITY- Nagtaram na an manhamiento kan 9th Infantry Division, Philippine Army katakod kan pagkakaimbwelto kan saindang 10 mga soldados sa kariribukan sa laog nin sarong resto bar sa Del Gallego, Camarines Sur.
Sa entrevista kan Bombo Radyo Naga ki Capt. Randy Llunar, chief, Division Public Affairs (DPAO), sinaysay kaini na miyembro kan Bravo Company na naka-assign sa nasambitang lugar an mga soldados na sinasabing nambugbog suboot sa tolong mga sibilyan mantang yaon sa laog kan bar.
Enot na napag-tripan suboot kan duwa sa mga sibilyan an soldadong binistong si Sgt. Glenn Despiras mantang nag-iihi ini.
Pinurbaran suboot na pugulan kan saro pang soldado an nasambitang mga sibilyan sa pangti-trip ki Despiras alagad dae pa nanggad an mga ini nag-untok na naging dalan suboot sa nangyaring rambol.
Nagsapo nin black eye, pasa sa saiyang ngimot asin pisngi an mga biktima na binistong sinda Jomar Balonzo, Joel Mergalejo asin sarong binisto sana sa pangaran na Ryan.
Apwera sa mga biktima, nadislocate man suboot an panga ni Sgt. Despiras huli sa pangyayari.
Mientrastanto, sigon man ki PS/Insp. Ryan Bagasal, hepe kan PNP Del Gallego, nagkaareglo na suboot an representante hale sa Philippine Army asin pamilya kan tolong mga sibilyan.
Sa ibong kaini, sigon ki Bagasala padagos pa nanggad an saindang ginigibong imbestigasyon asin pakikipagtabangan sa Philippine Army katakod kan nangyaring panununtok kan mga soldados sa nasambitang mga sibilyan.
