Pigsierto ni Ako Bicol Party-list Raul Angelo ‘Jil’ Bongalon na ipaglalaban kaini an Ayuda sa Kapos ang Kita Program o AKAP sa 2025 national budget sa tahaw kan suhestiyon kan nagkapirang Senador na haleon an pondo para digdi.
Segun ki Rep. An Bongalon, an AKAP para sa mga nagkikita na hababa pa sa P21,000 kada bulan na nagtitios pa maski na may trabaho.
Sinabi pa ni Bongalon na milyon-milyon na ‘near poor’ na mga kahimanwa an natabangan kan AKAP kan enot na taon kun kaya importante an pagtabang orog na an mga pinaka-apektado kan krisis sa ekonomiya.
Ginibo an pahayag makalihis na irekomendar kan Senate Finance Committee sa pamamayo ni Senador Imee Marcos na haleon na an AKAP sa 2025 budget kan DSWD asin ibalyo an pondo sa ibang programa siring kan Sustainable Livelihood Program asin Quick Response Fund.
Segun ki Marcos, an P39 bilyones na AKAP dae kabali sa orihinal na budget proposal kan administrasyon.
Maninigong tawan nin tabang an mga tawo na biktima kan bagyo, asin paglangkaw kan presyo kan barakalon, asin kuryente.
Saro ini sa tulos na paagi tanganing makahali sa katiosan asin direktang matabangan an mga ini.
Dugang pa ni Bongalon, an maraot iyo an programa para sa mga pobre na pigbabawasan pa nin ayuda.
Kapareho kan mga pagbawas sa pondo kan 4Ps kan mga nakaaging taon.
Nin huli ta bako man gabos na benepisyaryo natawanan kan 4Ps.
Sa papaabutong bicam conference, bilog an paninugan kan Kamara na ipaglaban an milyon-milyong mga pamilya para sa dagos-dagos na pagtabang kan AKAP sa mga obrerong Pilipino.
