Nangapudan an mga lider kan Kamara de Representantes na ipauntok na an pagpapakuriyat nin salang impormasyon katakod kan bagong desisyon kan Senado asin Kamara de Representantes na halion an subsidy kan gobyerno sa PhilHealth para sa 2025.
Segun ki Acidre bakong totoo na mayong magagamit na pondo an PhilHealth sa masunod na taon tanganing maipadagos an benepisyong itatao kaini sa mga miyembro.
Sinabi ni Deputy Majority Leader asin La Union Rep. Paolo Ortega V na baka an mga nagpapakuriyat nin salang impormasyon an bako man miyembro kan PhilHealth.
Pighurot kan duwang lider kan Kamara na igwa nin bastanteng pondo an PhilHealth tangani matabangan sa pagpapabulong an mga miyembro kaini.
Sinabi pa kaini na madudugangan an mga benepisyong ipapanao kan PhilHealth sa masunod na taon.
Pighurot man ni Ortega na kadakol pondo an PhilHealth tanganing maipadagos an mga programa kaini. Segun pa ki Ortega apwera sa PhilHealth posible man na maghagad nin tabang an mga pobreng pasyente sa Department of Health (DOH).
Sinabi ni Acidre na nasasabutan an mga pagkahadit kan mga miyembro kan PhilHealth na pighuhuna na mayo na sindang nakukuang benepisyo huli sa mga salang impormasyong pigpapakuriyat sa social media.
Dugang pa ni Acidre dapat man na siripon kan Kamara kun saen pigbubugtak kan PhilHealth an reserve funds kaini na nasa P607 bilyon an kantidad.
