NAGA CITY- Gadan an sarong 13-anyos na solterito makalihis na mabangga kan kotse na minamaneho kan sarong pulis sa Pamplona, Camarines Sur.
Binisto an biktima na si Jeffrey Januario, 13-anyos.
Sa entrevista kan Bombo Radyo Naga ki P/Insp. Greg Bascuña, hepe kan PNP Pamplona, sinaysay kaini na nagbabalyo an nasambitang solterito sa tinampo sa barangay San Gabriel kan mabangga ini kan kotse na minamaneho ni PO3 Ramon Gregorio Jr., 30-anyos asin presenteng nakadestino sa Camp Simeon Ola sa ciudad nin Legazpi.
Nagsapo kan lugad sa saiyang lawas an biktima na tulos man na pigdalagan sa ospital alagad pigdeklarar na ining dead on arrival kan mga doktor.
Basado sa imbestigasyon kan mga otoridad, bako suboot marikas an padalagan kan nasambitang pulis asin posibleng dae kaini nahiling an biglaang pagbalyo kan biktima.
Posibleng mahampang sa kasong reckless imprudence resulting to homicide an nasambitang driver kan bihikulo.
Maikokonsiderar naman suboot na accident prone area an nasambitang lugar huli sa nairerehistrong aksidente digdi.
