NAGA CITY- Haros dae na mabistado an sarong solterito makalihis na nagkapirang beses na malihis sa kalabaan kan Rolando Andaya Highway, Barangay Liboro, Ragay, Camarines Sur.
Sa entrevista kan Bombo Radyo Naga ki PO2 Erwin Reliña kan Ragay-PNP, sinaysay kaini na mag-uumagahon kan mangyari an insidente kun saen nakaresibe nin report an saindang hepatura hale sa mga barangay officials sa lugar katakod kan dae pa nabibistadong lalaki na pigtutubudang biktima nin ‘hit and run.’
Dugang pa ni Reliña, kinakarkulong 17-anyos pa sana an nasambitang indibidwal asin nakasulot ini nin bado na kolor brown na tshirt asin puting shorts.
Dae pa man maaraman sa ngonyan kun anong mga bihikulo an nakalihis sa biktima na nagsapo nin mga lugad sa saiyang payo asin lawas.
Sa ngonyan, ipinalubong na suboot kan mga barangay officials an solterito makalihis na mayong mag-claim na kaparyentes kaini alagad sigon ki Reliña, pwedeng ipa-DNA test an bangkay enkaso igwang mag-claim digdi.
