NAGA CITY– Sinabayan nin engkwentro sa pagultanan kan militar asin mga rebeldeng New People’s Army (NPA) an aldaw kan State of the Nation Address (SONA) ni Presidente Rodrigo Duterte kun sain sarong suldados an naibaretang nagadan. Binisto an biktima na si Corporal Argel Joseph dela Cruz.
Sa ipinaabot na impormasyon kan Southern Luzon Command (Solcom) sa Bombo Radyo Naga, napag araman na nangyari an nasambitan ng engkwentro sa Sitio Bantigue, Cagsiay 2, Mauban, Quezon.
Sigon sa mga otoridad, may nakaabot na impormasyon sa kasuldadusan katakod kan suboot extortion activitiies kan mga rebelde sa on going Mauban-Real road project.
Katakod kaini, tulos na nagkundusir nin combat patrol an tropa kan 76IB kun sain nakaengkwentro kan mga ini an nasa pitong armadong kalalakihan na naghaloy nin haros 10 minutong riribayan nin putok.
Napuruhan sa insidente si Dela Cruz mantang pigtutubudan man na may mga nalugadan sa lado kan mga rebelde huli sa mga tagdo kan mga dugo na nawalat sa lugar kan pinangyarihan.
Sa ngunian, nagpapadagos pa an clearing operation kan mga otoridad dapit sa nasambitan ng pangyayari.
