Pinag-aadalan na kan Committee for the Special Protection of Children (CSPC) an nagkapirang sistema tanganing makapagtao nin akmang tabang sa mga aking biktima kan pang-aabuso.
An nasambitan ng komite an pigbibilog kan Bureau of Immigration (BI), Department of Justice (DOJ) and Department of Social Welfare and Development (DSWD).
Sigun ki BI spokesperson Dana Sandoval, pigkokonsiderar kan inter-agency team an nagkapirang pagbabago sa presenteng piggagamit na sistema tanganing mai-akma sa sitwasyon kan mga pig-aabusong aki.
Nakapagsagibo na soboot an komite nin mga serye kan meeting kaibahan an mga representantes kan manlaen-laen na ahensiya, asin sa mga inisyal na pinaplano, an adjustment para sa mas magian asin episyenteng case management.
Digde man malaog an mas marhay na assistance sa mga biktima, gikan sa pagkakasalbar sa mga ini sa mga abuser asin dagusang pagsusunad nin kaso kontra sa mga abusado.
Pigkokonsiderar digde an two-way approach kun saen napo-protehiran an mga aki asin natatawan sinda nin akmang tabang, mantang napapanimbag asin naipapakulong an mga nang-aabuso sa sainda.
Sa kampo kan BI, nakapokus an mga ini sa mga aki asin kajovenan na nagigin biktima kan child trafficking.
Digde, nakikipagtabangan soboot an mga airline companies tanganing mapugolan an pagkakabiyahe kan mga ini pasiring sa ibang nasyon.
Pigbabantayan kan BI an mga kaso kan ‘cross-border trafficking and exploitation of children’ kun saen pigbabantayan man kan lambang palupadan an mga indibidwal na igwang record kan human trafficking na naglalaog sa nasyon sa tabang kan advance passenger information system.
Sakop man kan DOJ asin DSWD an pagprotehir sa mga aki asin paglilitis sa mga child abuser asin mga human trafficker.
