Nangapudan an sarong mambabatas na magkaigwa nin espesyal na sesyon kan Kongreso tanganing marikas na pag-ulayan asin ipasa an proponidong P52.8 billion supplemental budget bilang preparasyon sa mahiwas na epekto kan tensyon sa Middle East.
Nangapudan si Akbayan Party-list Representative Chel Diokno ki Presidente Ferdinand R. Marcos Jr. na i-certify an House Bill No. 8495 bilang urgent tanganing mapagian an pagabat kan publiko sa tahaw kan padagos na paglangkaw kan presyo kan lana asin barakalon.
Sa lindong kan nasabing bill, an binilyon na pondo gagamiton bilang ayuda sa tolong mayor na sektor.
An pinakadakulang porsyon, na nagkakantidad nin P38 bilyones, itatao para sa repatriation asin reintegration kan mga Overseas Filipino Workers (OFWs) enkaso mag-grabe an kariribokan sa Middle East.
P12 bilyones man an itatao para sa subsidiya sa gasolina para sa mga drayber asin mga trabahador sa transportasyon, mantang P2.8 bilyones an ipapanao sa sektor nin agrikultura, partikularmente sa mga apektadong paraoma asin parasira.
Segun sa mambabatas, dae dapat ipagpaliban an pagpasar kaini maski nasa recess an Kongreso.
Tinawang-duon ni Diokno na an presenteng paglangkaw kan presyo kan petrolyo iyo an direktang nagpapagrabe kan gutom asin kapobrehan sa nasyon.
Linilinaw man sa outline kan bill an dai pa sana nahahaloy na patanid ni Department of Energy (DOE) Secretary Sharon Garin, na nagsabi na posibleng makaeksperyensiya nin kakulangan sa supply nin lana an Pilipinas kun dae mahale an iriwal sa ibang nasyon.
