Aram baya nindo mga ka-bombo, sarong spider monkey na igwang sulot na diaper an nadakop na basay-basay sa San Antonio, Texas kasuarin sana.
Sigun sa San Antonio Animal Care Services na an ukay na ini an pigkakarkulo na edad 6 na bulan asin pigreport na mahihiling sa Northwest Crossing kan nasambitan ng lugar.
Tolos man na nagresponde an mga otoridad kun saen pag-abot kan mga ini sa area nahiling an nasambitan ng hayop na nakatukaw sa tinampo asin nakasulot nin diaper.
Matryumpo man na nadakop kan Animal Care Services an ukay asin nakipagtabangan sa iba pang opisina para sa proteksyon kaini.
Mientrastanto, nabisto naman an maysadiri kan hayop asin mahahampang sa magkakanigong penalidad huli sa mga kakulangan kaini siring kan kawaran nin rabies vaccine, kawaran nin animal microchipped asin an pagpapabaya na basay-basay an saiyang ataman sa siyudad.
An pig-aapod na Spider monkeys an orihinal na gikan sa southern Mexico, Central asin South America, sinda an pigkokonsederar na mga exotic animals asin dae pigtutugutan na magin ataman o pets sa San Antonio.
