NAGA CITY- Kinumpirmar ngunian kan Philippine National Police (PNP) na positibong cocaine an narekober na substance na nagpapataw pataw sa kadagatang sakop kan Vinzons,
Camarines Norte.
Sa entrevista kan Bombo Radyo Naga ki PCI Charles De Leon, Chief of Police (COP) kan Mercedes PNP, sinaysay kaining basado sa resulta kan nagin eksaminasyon kan Crime Laboratory, positibong cocaine an nasambitan ng substance na maabot sa labi P1,000 gramo an timbang mantang kinakarkulong maabot man sa P1.3 million an kantidad kaini.
Sigon ki De Leon, bunga ini kan saindang mahigot na monitoring sa mga coastal areas sa nasambitan ng probinsya makalihis an enot na pagkakarekober kan sarong container na
naglalaman nin 27 bricks of cocaine an mga parasira sa kadagatang sakop kan Quezon-Bicol kan mga nakalihis na semana.
Kun marurumduman, sarong parasira man an nakahiling kan nasambitan ng substance na suboot nagpapataw pataw sa tahaw kan kadagatan na tulos man kaining itinurn over sa kapulisan.
Sa ngunian, apwera sa ginigibong monitoring sa mga coastal areas, mas pinakusog man suboot kan mga otoridad an information dissimination sa publiko para magkaigwa an mga ini nin ideya kun ano an itsura kan cocaine para mas makatabang sa saindang paghahanap sa posibleng mga kaibahan pa kan nasambitan ng substance.
