Pigheras kan sulamenteng survivor sa plane crash sa India kun pano ini milagrong nakaluwas gikan sa wreckage kan eroplano.
Sa entrevista kan local media sa India, piggirumdom kan 40 anyos na British national na si Vishwash Kumar Ramesh na presenteng nagpaparahay sa ospital, na kan imuklat kaini an saiyang mga mata nagtampad sa saiya an mga pasahero asin flight attendant na mayo nang buhay.
Nagibo soboot kaining makaluwas sa paagi kan puwersang pagbukas sa naraot na emergency exit door na bahagyang nakabukas kaidto na harani sana sa saiyang pigtutukawan sa seat 11A kan Air India Boeing 787 Dreamliner.
Nilinaw man kaini na dae ini naglukso nin huli ta nasa ground na kaidto an eroplano kundi naglakaw ini nagluwas kan emergency exit.
Bakong gayong dakula an kalayo sa parte kan eroplano kun saen ini nakatukaw kan bumagsak ini sa ground alagad kan makaluwas na ini gikan sa eroplano, dagusan na ining sumabog.
Nagsapo man nin galos si Ramesh sa saiyang walang braso huli sa kasulo.
Piggirumdom man ni Ramesh na marikas an mga nangyari nin huli ta 30 segundo pa sana makalihis magtake-off an eroplano, nagkaiwa nin makusog na ribok saka dagusang bumagsak an eroplano.
Si Ramesh an pabalik na sa United Kingdom kaiba an saiyang tugang kan mangyari an trahediya. Kaib an saiyang tugang sa 241 pasahero asin crew na binawian nin buhay sa insidente.
Mientrastanto sigun ki Dr. Rajnish Patel, an head kan surgery sa Ahmedabad Civil Hospital kun saen dinara an survivor sa plane crash, bakong kritikal an kamugtakan ni Ramesh asin pwede na kaining ma-discharge sa mga masunod na aldaw.
