NAGA CITY – Gadan an sarong suldados makalihis aksidenteng makuryente sa Purok 5 Barangay San Isidro, Talisay, Camarines Norte.
Binisto an biktima na si Pfc Angelo Regondola, 30-anyos kan 96th Infantry Battalion, 9th, Infantry Division, Philippine Army.
Sa nakuang impormasyon kan Bombo Radyo Naga sa Camarines Norte Police Provincal Office (CNPPO), napag-araman na dara kan biktima an sarong kawayan na gagamiton kuta na komo antenna pole para sa saindang WIFI signal.
Papuli na kuta na ini sa saindang harong kan aksidenteng maksabit sa live wire kan National Grid Corporation of the Philippines (NGCP) an darang kawayan na naging rason kan saiyang pagkakakuryente.
Tulos man na idinalagan sa ospital an biktima alagad idineklarar na ining dead on arrival kan mga doktor.
