Piglalaoman na magpapadagos an suporta kan Estados Unidos sa Pilipinas katakod kan isyung West Philippine Sea kasunod kan pagbisita ni US Secretary of State Marco Rubio sa nasyon.
Segun sa tagapagtaram kan Philippine Coast Guard na si Rear Admiral Jay Tarriela, pigduon ni Rubio an commitment kan Estados Unidos sa pagsuporta sa Pilipinas asin pagkontra sa mga agresibong aksyon sa kadagatan.
Sinabi ni Tarriela na kabali sa piglalaoman na tabang kan Estados Unidos an pagtao nin maritime equipment, assets, asin training tanganing mapakusog an kakayahan kan Philippine Coast Guard.
Si Presidente Ferdinand Marcos Jr. asin Presidente kan Estados Unidos Donald Trump nag-orolay man daa kan mga insidente nin panraraot kan mga Intsik sa West Philippine Sea.
Mientrastanto, pigduon kan PCG na an diplomasya an magdadanay na prayoridad kan Pilipinas mantang padagos kaining pinapakusog an kakayahan kan nasyon na idepensa an maritime rights kaini.
Dugang pa ni Tarriela na an Philippine Coast Guard (PCG) an padagos na pagdepensa kan Pilipinas sa saiyang derechos sa West Philippine Sea (WPS), sa tahaw kan padagos na tensyon asin soboot pang-harass kan Tsina sa kadagatan.
Tarriela, sinabi kaini na mantenidong importante an 2016 Arbitral Award, na nagpapatunay sa legal na posisyon kan Pilipinas asin kanselaron an basehan kan nine-dash line claim kan China.
Sinabi pa ni Tarriela na dae man nababawasan an validity kan desisyon dawa dae ini binibisto kan China, urog na padagos na nagsusuporta an ibang nasyones sa international law.
Tinawan man niya nin duon an pagpapakusog kan kakayahan kan Pilipinas sa paagi kan modernisasyon, pagsasanay, asin suporta hale sa mga kaalyado mantang pinapadanay an diplomasya bilang prayoridad sa pag-atubang sa isyu kan WPS.
