NAGA CITY- Pigheras kan namamayo kan City Veterinary Office na bastante pa man an supply kan sugok sa siyudad nin Naga.
Sa entrevista kan Bombo Radyo Naga ki Dr. Marilee Lingua- Head of Naga City Veterinary Office, pigsaysay kaini na an sainda sanang pigbabantayan ngunyan an Avian influenza kun saen sa ibang probinsya siring kan Camarines Norte na igwa nin naikurit na kaso kan nakalihis na bulan alagad nadepopulate man tulos ini.
Sigun ki Ligua, bastante pa man hasta sa ngunyan an supply kan sugok, alagad posible soboot maapektaran an pagsugok kan mga manok asin pato orog na ta papaabuton an summer season.
Huli digdi, nagpagirumdom an opisyal sa mga livestock farmers pag-abot sa management kan saindang mga ataman na hayop.
Mientrastanto, pigheras man ni Lingua na sa siyudad nin Naga an mayo man nin dakulang poultry farm kaya haros gikan sa luwas kan siyudad an supply kan mga sugok digdi.
Alagad naglilibot an saindang mga inspector para sa pagbabakuna kan mga hayop na yaon sa mga backyard poultry.
