NAGA CITY- Inarestar sa laog mismo kan Hall of Justice an suspek sa nangyaring pambabadil gadan sa sarong pulis sa banwaan nin Nabua, Camarines Sur.
Sa entrevista kan Bombo Radyo Naga ki P/Supt. Eugenio Manondo, hepe kan Iriga City PNP, sinaysay kaini na inarestar sa lindong kan mandamiento de aresto na igwang petsang Oktubre 25, 2017 an suspek na si Joebert Ranido, 38-anyos mantang nasa laog kan Hall of Justice sa nasambitang ciudad para sa pagdangog sa kinakaatubang kaining kasong possession of illegal firearms.
Sigon ki Manondo, si Ranido an pigtutukdong nasa likod kan pambabadil gadan sa pulis kan Iriga City PNP na si PO1 Noel Pili na nangyari sa banwaan nin Nabua.
Dugang pa ni Manondo, naanggot suboot an suspek sa nasambitang pulis makalihis na tawan siya kaini nin citation ticket huli sa sarong traffic violation.
Nahahampang ngonyan sa kasong direct assault with murder an suspek na mayong pigrerekomendar na pyansa.
Marurumduman na naghahalat sana si Pili sa bus stop sa banwaan nin Nabua kan pagbabadilon ini kan apat na mga suspetsado na nagresulta sa saiyang tulos na kagadanan.
