Pig-arestrar na kan mga awtoridad sa Los Angeles, California an suspek sa pambabadil gadan sa apat na indibidwal kabale an duwang Pinoy kan Nobyembre 16.
An Los Angeles County Sheriff’s Office nag-anunsyar kan pag-arestar sa 19-anyos na suspek na si Miguel Sandoval, sarong residente kan Lancaster.
Segun sa Sheriff’s Office, kinasuhan nin murder si Sandoval huli sa paggadan ki Christine Aca-Ac, 26-anyos asin Janvi Maquindang, 21-anyos, parehong Pinoy asin magturugang, siring man ki Edwin Garcia, 24-anyos asin Matthew Montebello.
Nakua kan mga awtoridad an bangkay ni Christine asin Janvi, kaiba an nobyo ni Christine na si Garcia na may tama nin bala.
Si Montebello binawian nin buhay sa ospital huli sa tama nin bala. Binadil man kan suspechado an tolong ayam kan mga biktima.
Tulos man na nagdulag si Sandoval makalihis an pambabadil asin nagporbar na suluon an harong kan mga biktima.
Saro sa mga biktima an nakapag-apod sa 911 tanganing makaresponde tulos an mga awtoridad. An mga imbestigador dae pa nagluluwas nin motibo sa krimen.
An Opisina kan Sheriff nag-pepreparar ng ipresentar an kaso kontra ki Sandoval sa District Attorney’s Office sa Lunes.
