NAGA CITY- Nakatalaang sangatan na nin maninigong kaso an suspek sa panggagadan sa sarong Overseas Filipino Worker (OFW) sa laog nin sarong hotel sa banwaan nin Daet, Camarines Norte.
Sigon ki P/Supt. Wilmore Jalamani, hepe kan PNP Daet, pigpapakarhay na ninda an maninidong mga dokomento tanganing masangatan na nin kaso an suspek na si Cesar Sulivan na personal na nagsuko suodma sa opisina ni Camarines Norte Gov. Egay Tallado.
Si Sulivan an suspek sa pananaksak gadan s sarong OFW na si Sarah Mae Reyes Cabatingan na nadukayan an bangkay na nakatago pa sa kama sa Travellers Hotel sa banwaan nin Daet.
Nag-iwal suboot an duwa makalihis na piriton kan biktima na mag-iba saiya sa Davao del Sur an suspetsado.
Napag-araman na igwang relasyon an duwang persona na nagkabistuhan sa paagi kan social media site na Facebook.
Sigon ki Jalamani, nabistado an suspek makalihis na mahiling an mga litrato asin pangaran kaini sa cellphone kan biktima.
Ikinaugma man kan PNP Daet an pagsuko asin pagkakaarestar ki Sulivan huli naman ta pigkokonsiderar nindang sarado na an nasambitang kaso katakod kan pagsuko kan suspek ki Gov. Tallado suodma.
Sigon ki Jalamani, nakaulay na niya an pamilya kan biktima na nakatalaan na magpasiring sa banwaan nin Daet para kuanon an bangkay kaini.
Nag-abiso man an opisyal sa mga namamanwaan na dae tulos magtugot na makipaghilingan sa sarong tao urog na an mga nabistado sana sa paagi kan social media sites.
