Pigkumpirmar kan Syria na nagresulta sa pagkagadan kan nagkapira sa saindang soldados asin mga sibilyan an pangingiaram kan Israel makalihis kaining bombahon an Syrian forces sa Suwayda, siyudad sa southern Syria na harani sa border kan Jordan asin Israel.
An nasambitan ng pag-atake sa Syrian forces asin sa saindang weapons an ipinagsugo ni Israeli prime minister Benjamin Netanyahu huli ta plano soboot kan gobyerno kan Syria na gamiton an mga ini konta s Druze.
An Druze militias an nakikipaglaban para sa Israel sa lambang Arab-Israel war asin sulamenteng Arab group na pigtugotang magin soldados sa Israel Defense Forces.
Kan nakalihis na domingo kaya nagsiklab an labanan sa tahaw kan Druze militias asin Bedouin tribes na naggadan sa 200 indibidwal sigun sa report gikan sa Syrian Observatory for Human Rights.
Pig-akusaran man kan grupo an government forces kan Syria asin saindang kaalyado kan summary execution sa mga sibilyang Druze.
Ini man an enot na pagkakataon na pigdeploy an Syrian government forces sa Suwayd puon kan patalsikon kan Islamist-led rebels si dating Syrian President Bashar al-Assad.
Nagpromesa man si Netanyahu na dae ninda pababayaan na mabugtak sa peligro an Druze sa Syria huli sa hararom na koneksiyon kan mga ini sa mga naka-sitar sa Israel asin sa Golan Heights.
Mientrastanto, nagtahaw na an Trump administration kun saen pighagad kaini sa Israel na punduhon an pag-atake sa Syrian military forces.
Pig-anunsyar man kan defense minister kan Syria an ceasefire sa Suweida mantang sa kampo man kan Israel, naireport na uuntokon na kaini an pag-atake kan nakalihis na banggi nin Martes.
