Pigbusol ni Presidente Ferdinand “Bongbong” R. Marcos Jr., sa Kamara sa pamamayo ni Speaker Ferdinand Martin Romualdez asin Social Welfare Sec. Rex Gatchalian, an Tabang Bikol, Tindog Oragon relief initiative kun saen haros P750 milyones na kantidad nin tabang pinansyal asin 24 na trak na pano nin relief goods an ipapanao sa labi sa 150,000 na benepisyaryo sa rehiyong Bikol na naapektaran kan sunod-sunod na bagyo, asin an huring raot nin panahon iyo an supertyphoon Pepito.
An programa kun saen si Speaker Romualdez an mayor na tagapagtaguyod, ini igwa nin obheto na suportaran an mga apektadong komunidad sa Camarines Norte, Camarines Sur asin Albay na tulos na makabangon sa hagupit kan bagyong Kristine, Carina, asin Pepito.
Segun ki Speaker Romualdez, ini an direktiba ni Presidente Marcos, na matabangan an mga apektado kan bagyo sa Bicol.
An asistensya nababanga sa tolong mayor na aktibidad: an pagdistribwer nin tabang pinansyal, pagkondusir kan mini-Bagong Pilipinas Servisyo Fair (BPSF), asin an pagdistribwer nin relief goods.
Segun ki House Deputy Secretary General Sofonias “Ponyong” P. Gabonada, an inisyatiba pig-amendar man ni House Appropriations Committee Chairman Zaldy Co – na gikan sa Bikol asin nagrerepresentar kan promisa kan Kamara sa sarong “holistic and sustainable recovery” na masimbag bako sana sa presenteng pangangaipo.
Sinabi ni Gabonada na an Department of Social Welfare and Development (DSWD) an mangengenot sa pagdistribwir kan ayudang pinansyal sa irarom kan saindang Assistance for Individuals in Crisis Situations (AICS) na programa poon sa Nobyembre 18. An mini-BPSF ilulunsar sa Nobyembre 21. asin matao nin manlaen-laen na serbisyo gikan sa mga ahensya sa gobyerno.
Piglalaoman na magkakaigwa nin 10,000 na benepisyaryo an kada lokasyon.
Pigtawan duon ni Speaker Romualdez an importansya kan pag-iba sa pagdistribuer kan financial assistance sa mga serbisyong itinatao kan manlaen-laen na ahensya kan gobyerno tanganing mas marikas na makabangon an mga biktima kan kalamidad.
Sarong importanteng aspeto kan inisyatiba iyo an pagdistribwer kan mga relief goods na nakolekta sa donation drives, segun ki Speaker Romualdez.
Kabale sa mga ipapadara sa mga biktima iyo an sako nin bagas, asin mga de-lata hale sa manlaen-laen na grupo siring kan Tingog Party-list, PHILRECA, National Irrigation Administration (NIA), asin hale sa pribadong sektor.
Sa maabot na Nobyembre 21, gigibuhon an seremonial turnover kan relief goods sa mini-BPSF event sa syudad nin Naga, Pili, asin Polangui.
