NAGA CITY – Pig-asigurar ni Naga City Mayor Nelson Legacion na papabayaan kan LGU an Julian Meliton Elementary School asin paglalapigotan na maitao an mga pangangaipuhan kan mga estudyante asin paratukdo digdi.
Sa nagin patara-tara kan alkalde sinaysay kaini na napaka importante kan edukasyon para saiya huli ta ini an saiyang nagin dalan tanganing makahawas sa kapagtiosan.
Kun kaya mawot man kaining matabangan baku sana an mga estudyante kundi magin an mga paratukdo sa nasambitan ng eskwelahan orog na ta napag-araman na nagtitinir na double shifting an mga ini huli sa kakulangan clasrooms.
Huli digdi, nadidipisilan an mga paratukdo na matutukan an saindang mga estudyante asin nagkakaigwa nin pressure sa mga estudyante kumparar sa normal na sitwasyon. Apwera pa digdi, pinagkakahandalan man na igwa nin mga oras an mga estudyante na nasasayang huli sa siring na sitwasyon.
Katakod kaini, mahampang an alkalde ki DepEd Secretary Sonny Angara tanganing hagadon an saiyang desisyon dapit sa pigbubusol na magkaigwa nin pang walong bagong eskwelahan sa Naga na aapudon na Metro Naga Academy.
Ini nin huli ta maggigikan an pinal na desisyon dapit digdi sa sekretaryo kan DepEd. An primerong school building na ikokonstruhir an igwa nin 12 palapag, 16 classrooms asin nagkakantidad nin nasa P700-M.
Inkoneksyon sa nasambitan ng proyekto, igwa naman sindang naresibe na Memorandum na nagsusugo kan pagkondusir nin soil testing tanganing masierto na magigin pusog an ikokonstruhir na eskwelahan asin dae ini basang na magagaba.
Sa ibong na lado, nagpaabot nin pasasalamat si Dr. Susan Collano, SDS kan Deped Naga ki Legacion asin sa Sangguniang Panlungsod huli sa paglalapigot kan mga ini na matabangan asin mapauswag an edukasyon sa syudad.
