NAGA CITY – Nagbaba an tarifa sa kuryente na nasasakupan kan CASURECO 2 ngunyan na bulan nin Hunyo, 2024.
Sa entrevista kan Bombo Radyo Naga ki Rinner Bucay, tagapagtaram kan CASURECO 2, pigsaysay kaini an nagbaba an tarifa kan kuryente sa Residential an nasa P5.9290/kWh gikan sa P10.7583/kWh kan bulan nin Mayo, kun saen an pigbaba kaini an nasa P4.8290/kWh.
Sa Low Voltage man an nasa P5.0537/kWh gikan sa P9.8830/kWh kan Mayo. Mantang sa Industrial Rate man an power rate kan nakalihis na bulan an nagpakol sa P9.0416/kWh mantang ngunyan na bulan, P4.1259/kWh asin nasa P4.9157 an binababa kaini. Kun isusumatotal kumparar kan nakalihis na bulan, haros kabangga an binaba sa tarifa kan kuryente.
Sigun ki Bucay, nagkapira sa mga karasonan kan pagbaba iyo an; pagsunod kan Casureco 2 sa naipaluwas kan Energy Regulatory Commission (ERC) kan Hunyo 13, 2024 dapit sa 4-Month Staggered Collection and Payment for Distribution Utility’ Wholesale Electricity Spot Market (WESM).
Dugang pa kaini, pigsunod man kan saindang lado an adjustment base sa ERC resulotion No.14 series of 2022 kasuguan kan ERC para sa gabus na mga Electric Cooperative sa pagcompute nin bulanan na tarifa sa kuryente.
Sa ibong kaini, pigbabantayan man kan saindang lado an posibleng liwat na paglangkaw tarifa sa kuryente sa bulan nin Hulyo. Ini nin huli ta ngunyan na bulan, marhay an nagin rate o nagin paborable sa mga miembros-konsumedores. Magkakaigwa man kaya soboot nin current bill sa Wholesale Electricity Spot Market asin sa Staggered Payment na epekto puon Mayo hasta Agosto.
Sa ngunyan, kahagadan liwat ni Bucay an tamang paggamit kan kuryente asin mas makakamarhay soboot na magtipid sa paggamit kaini tanganing enkaso man liwat maglangkaw, dae mamamatean an paglangkaw sa bayadan sa kuryente.
