NAGA CITY- Prangkang sinaysay ni Camarines Sur 2nd district Rep. LRay Villafuerte na mayong maraot sa mga tarpaulins na nakabugtak an saiyang lalawgon kaibanan si Gov. Migz Villafuerte.
Ini huli ta pagpapasalamat sana suboot ini kan mga namamanwaan sa saindang ginibong espwersos tangani na maiparelease na an Emergency Shelter Assistance (ESA) kan Department of Social Welfare and Development (DSWD.)
Ini an tinawan duon ni Villafuerte sa ekslusibong entrevista kan Bombo Radyo Naga.
Segun sa kongresista, mayong maraot sa nakabugtak na mga tarpaulins sa mga pay-out activities kan DSWD.
Tinawan duon pa kan opisyal na bakong pagigin ‘epal’ kun nagpasiring sinda sa nasambitang aktibidad huli ta ginigibo sana suboot ninda an saindang trabaho komo mga public officials.
Mientrastanto, sinaysay ni Villafuerte na in-acknowledge ninda na hale sa DSWD an pondo kan ESA na pigtatao sa mga nabiktima kan bagyong Nina asin klaro suboot ini sa mga namamanwaan.
Prangkang sinaysay man kan kongresista na bakong DSWD an solamenteng ahensya kan gobyerno na front liner sa pagtatao nin tabang sa mga namamanwaan kundi an mga lokal na gobyerno.
Enot kaini, prangkang sinaysay ni Villafuerte na pamumulitika sana an yaon sa likod kan mga sahot katakod kan paggamit suboot sa ESA kan DSWD sa early campaign kan mga ini.
Sinaysay kan kongresista na mawot sana sindang raotan kan mga kalaban sa pulitika tangani na maanggot an mga namamanwaan.
