NAGA CITY- Preparado na an pigbilog na grupo kan Task Force Fluvial sa siyudad nin Naga City para sa papaabuton na Fluvial Procession.
Sigun ki Lieutenant Junior Grade (LTJG) Eiderrf Lloyd Olea Public Information Officer, Philippine Coast Guard Camarines Sur pig-abisuhan na an mga malunad sa pagoda na mapakol sa 200 na indibidwal kaiabahan na an mga kapadian tanganing maasigurar an kasalbaduhan kan mga ini.
Dugang pa ni Olea, igang checking na mangyayari sa aga antes an paglunad sa pagoda ki Ina Peñafrancia tanganing masierto an paz y orden asin kasalbaduhan kan ikukundusir na fluvial prrocession.
Para man sa mga parasagwan sa fluvial procession igwang nasugo na asosasyon kun saen sinda an mapaluwas kan mga listahan sa mga miyembro kaini para sa nasambitan ng aktibidad.
Mientrastanto, igwang mga portion man kan agihan na isasarado siring kan Colgante, Panganiban asin iba pang tulay na aagihan kan prusisyon tanganing maasegurar na mayong mangyayaring dakulang problema o malikayan an pagbungkaras nin mga trahedya sa panahon kan kasiributan.
Sa ngunyan, hagad na sana kan opisyal an kooperasyon kan publiko para sa mas solemne asin matuninong na pagkundusir kan Fluvial Procession sa aga, Setyembre 20, 2025.
