NAGA CITY- Gadan an sarong tattoo artist sa nangyaring pangbabadil sa Barangay Malabanban Norte, Candelaria, Quezon.
Binisto an biktima na si Herson Gamilla, 44-anyos.
Sa nakuang impormasyon kan Bombo Radyo Naga sa Quezon Police Provincial Office, napag-araman na mantang nakatindog sa terasa kan saindang harong kan biglang mag-abot an suspek na armado nin armas.
Nagsapo nin lugad sa manlaen laen na parte kan lawas an biktima na nagin rason kan saiyang tulos na pagkagadan.
Napag-araman na dati nang nadakop an biktima huli sa kasong may koneksyon sa iligal na droga.
Sa ngunian nagpapadagos pa an imbestigasyon kan mga otoridad mantang pinaghahanap naman an suspek na tulos nagdulag makalihis an insidente.
