Makasar an Bureau of Internal Revenue (BIR) nin tax fraud investigation sa mga kotraktor na imbwelto sa maanomalyang flood control projects na pigtutukoy ni Presidente Ferdinand Marcos Jr.
Sa sarong statement ngunyan na aldaw nin Martes, sinaysay ni BIR Commissioner Romeo Lumagui Jr. na masagibo sinda nin audit sa tax returns asin payments kan nasambitan ng entity.
Sinugo man an BIR Offices na mahigot na bantayan an mga development sa imbestigasyon kan Presidente asin magsagibo nin parallel audit sa mga imbwelto na kontraktor.
Enkaso man soboot igwang mga kontraktor na underpaid o mag-iwas s pagbabayad nin buwis, dae sinda iisyuhan kan bureau nin updated tax clearance asin madidiskwalipika an kontraktor gikan sa pagpartisipar sa procurements kan gobyerno sa pigkakahampang asin sususpendiron an saindang mga kontrata sa gobyerno.
An nasambitan ng direktiba an alinsunod sa Revenue Regulation No. 17-2024 na nagmamandato sa mga kontraktor kan gobyeno na dapat magkaigwa muna nin updated tax clearance gikan sa BIR antes an final settlement kan anuman na kontrata sa gobyerno.
Hurot pa kan opisyal na sisiertuhon kan BIR na nagbabayad nin tamang buwis an gabos kan kontraktor sa nasyon.
Bako man soboot katanggap-tanggap na nagkikita sinda gikan sa milyung-milyong pigpopondohang buwis kan mga Pilipino asin negosyo alagad dae sinda nagbabayad nin tamang buwis.
Pag-abot man sa napareport na ghost flood control projects, enkaso makumpirmang mayo talagang mga proyeto, ma-isyu an BIR nin deficiency tax assessments kontra sa mga imbwelto na kontraktor.
