NAGA CITY- Piglalaoman ngunyan kan sarong principal sa Goa Central School na an gabos na pigpahayag ni Presidente Ferdinand Bongbong Marcos Jr sa saiyang nakalihis na SONA an mauutob orog na an pagtatao nin dugang na benepisyo para sa mga paratukdo asin pagbabago sa lado kan edukasyon sa nasyon.
Sa entrevista kan Bombo Radyo Naga ki Oscar Parola, Principal kan Goa Central School, sinaysay kaini na dakulang katabangan an pigtutulod na promotion sa mga public school teachers, pagtatao nin dugang na allowances asin an saindang pighuhurot na dugang na sweldo tanganing masimbagan an naglalang problema sa education sector sa bilog na nasyon.
Sigun pa ki Parola, an pigbubusol na promosyon sa mga paratukdo an makakatabang tanganing ma-improve an saindang pagbuhay.
Dugang pa kaini, mawot pa kan saindang lado na madangog kan bagong nakatukaw na sekretaryo asin kan gobierno an pagkakaigwa nin dugang na sweldo nin huli ta saro ini sa mga haloy naman na kahagadan kan gabos na paratukdo sa bilog na nasyon.
Sa ngunyan, pigpasalamatan na sana kan opisyal an gabos na mga nagtatabang tanganing mapamarhay an buhay kan mga estudyante.
