NAGA CITY- Binuyagyag kan Libmanan-PNP na igwa na sindang lead sa termite gang na pigtutubudang naglaog sa UCPB bank sa banwaan nin Libmanan, Camarines Sur.
Sa entrevista kan Bombo Radyo Naga ki PCI Chito Oyardo kan Libmanan-PNP, kinumpirmar kaini na igwa ng pagkakabistuhan an sarong miyembro kan nasambitang gang asin inaandam na ninda ngonyan an kasong Robbery na isasangat laban digdi.
Hinahalat na sana suboot ninda ngonyan an dugang na impormasyon hale sa dae na pinangaranan pang ahensya para mahanap an termite gang suodma o ngonyan na aldaw.
Dugang pa ni Oyardo, pigbibilog an grupo nin limang miyembro na igwang sarong babae asin apat na lalaki.
Igwa man suboot posibilidad na may nag-tip na lokal na residente sa lugar manungod sa mga detalye kan pighabunan na bangko huli ta nakua tulos kan grupo an mismong vault kan establisimiento.
Napag-araman man hale sa hepe na Ilocano an nagkapira sa mga miyembros kan nasambitang gang.
Marurumduman na nakua hale sa crime scene an nagkapirang mga gamit arog kan jack asin electric grinder na pigtutubudang ginamit kan mga suspek sa panhahabon sa bangko.
Nawalat man an sarong sako nin barya na naglalaog nin pigkakarkulong maabot sa P30,000.
Bistadong modus kan termite gang an pagkalot sa irarom kan daga para makalaog sa target na habunan.
