Inakusaran kan Thailand army an Cambodia nin pagbalgar sa panibagong pinirmahang ceasefire agreement kan nakalihis na Sabado, Disyembre 27 makalihis an pirang semanang labanan sa saindang borders na naggadan nin dose-dosenang katawo asin nagpa-displace sa labi sarong milyong residente.
Sa sarong statement, sinaysay kan Thai army na nagpalupad soboot an Cambodia nin labi 250 unmanned aerial vehicles sa saindang teritoryo kan nakalihis na domingo nin banggi.
An mga aksiyong ini soboot an probokasyon asin pagbalgar sa lakdang na obhetong pahupaon an tensiyon alinsunod sa napagkasunduang Joint Statement.
Dara kan bagong mga alegasyon, nanganganib an pagkawara sa mga soldados na Cambodian na kapot kan Thailand, na kaibahan sa napagkasunduan kun mamamantir sa laog sa 72 oras an ceasefire puon kan ini an magin epektibo.
Sa kampo man kan Cambodia, pigladawan sana ni Foreign Minister Prak Sokhon an drone incident komo sarong sadit isyu na igwang koneksiyon sa pagpapalupad nin drones na nanutaran kan parehong kampo sa may border line.
Napag-ulayan na soboot ini kan duwang kampo asin nagtugot na imbestigaran asin tulos na resolbaran.
Alagad, pighurot ni Thai army spokesman Winthai Suvaree na pigpapahiling kan drone activity kan Cambodia an padagos na probokasyon kaini asin malipot na koneksiyon kaini sa Thailand na nakakaapektar sa seguridad kan saindang militar asin mga sibilyang nasa border areas.
Mientrastanto, sa pagtatapos kan duwang aldaw na pag-urulay kan foreign minister kan Thailand asin Camboda na pinangenotan kan China kan nakalihis na aldaw nin Lunes sa Yunnan province, nag-isyu nin statement an 3 nasyon na pinag-urulayan an mga lakdang tanganing liwat na magkaiga nin political mutual trust, asin mapamarhay an bilateral relations kan Cambodia asin Thailand asin mamantinir an katatagan sa rehiyon.
Sinaysay man kan Cambodia na pig-enkaminar kaini an Thailand na mag-iba sa panibagong bilateral meeting sa Cambodia sa enot na parte kan Enero sa masunod na taon tanganing pag-urulayan asin ipagpadagos an survey asin demarcation work sa border.
