Liwat na sumiklab an tensiyon sa pag-ultanan kan Thailand asin Cambodia makalihis maglunsar an Thailand kan air strikes sa may disputed border kaini sa Cambodia, sigun sa Thai military ngunyan na Lunes, Disyembre 8.
Ini an makalihis magbarasulan an parehong nasyon kan pagbalgar sa ceasefire agreement na inareglo ni US President Donald Trump.
Sa sarong statement, kinumpirmar kan Thailand military na nagadan an sarong sundalong Thai asin nalugadan an apat pang katao sa pag-atake kan Cambodia sa duwang lugar sa easternmost province kan Ubon Ratchathani.
Katakod kaini, pinuonan na kan panig kan Thai an paggamit kan aircraft tangani tamaan an target kaining military kan Camboadia sa manlaen-laeng lugar.
Sa panig man kan Cambodia, sinaysay kan defense ministry na an Thai military soboot an naglunsar kan pag-atake mag oomagahon sa saindang pwersa sa duwang lokasyon kasunod kan pirang aldaw na mga probokasyon asin dae soboot nagbalos an saindang mga tropa.
Marurumduman, naenot ng sumiklab ngunyan na taon an border dispute kan Hulyo, na nakagadan sa 48 katao asin nagpa-displaced sa 300,000 katao.
Nauntok an labanan kaidto makalihis magin epektibo an ceasefire deal na inareglo ninda Malaysian Prime Minister Anwar Ibrahim asin Trump, na parehas sinaksihan an pagtinta sa expanded peace agreement sa pag-ultanan kan duwang nasyon sa Kuala Lumpur, Malaysia kan Oktubre.
