Nairehistro kan Thailand an primerong kaso nin pagkagadan gikan sa anthrax makalihis kumpirmaron kan mga opisyal an duwang kaso nin impeksyon asin ginatos an posibleng na-expose sa bacteria.
Sigun sa mga opisyal, pinagkakarkulong 638 katao an posibleng na-expose, kadaklan an nagkakan kan hilaw o kulang sa luto na mga karne nin baka.
Sa numero na ini, 36 an nagtabang sa pagkagadan kan hayop. Mantang an gabos ay tinawan na nin antibiotics komo parte kan containment measures.
Nagdeklarar na an Department of Livestock nin 5-kilometer quarantine zone sa palibot kan lugar asin man planong bakunahan an 1,222 na baka, bagaman mayo pang hayop an nagpapahiling kan sintomas o dae maipaliwanag na pagkagadan.
Mientrastanto an anthrax an sarong rare alagad serious bacterial disease na karaniwang nakukua sa paagi kan pag-kontak sa hayop o pagkakan nin kontaminadong karne, alagad dae ini naipapasa gikan tao sa tao.
Huring nagkaigwa nin kaso kan anthrax sa Thailand kan taong 2017, alagad mayo nin binawian nin buhay.
Kasabay kan paglangkaw nin kaso kan anthrax sa rehiyon—siring na sana kan 129 kaso asin man sarong pagkagadan sa Laos kan nakalihis na taon, asin 13 kaso sa Vietnam kan Mayo 2023, padagos an pagbabantay kan Thailand, orog na sa mga border area kaini.
