Nag-alay nin banal na misa an simbahan kan Minor Basilica and Metropolitan Cathedral of the Immaculate Conception o mas bistado komo The Manila Cathedral para sa gigibuhon na conclave ngunyan na aldaw.
Kun saen pigsagibo an enot na misa pasado alas-syete kasubagong aga komo pakikisumaro sa mga kardinal na nakatalaan na magpili kan panibagong Santo Papa.
Pinangenotan mismo ni Fr. Vicente ‘Viel’ Gabriel Bautista, Vice Rector kan The Manila Cathedral an selebrasyon kan banal na misa.
Parte kan saiyang nagin homiliya, pighayag kaini na an aldaw na ini iyo an maikokonsiderar man makasaysayan alagad malaog liwat soboot sa laog kan Sistine Chapel kan Vatican an labi sanggatos na kardinal tanganing lubos na ipangadyi, pagnilayan asin mag-elehir nin panibagong lider kan simbahang katolika.
Dugang pa kaini, pig-enkaminar kan nasambitan ng padi na dae sana maghiling o ibaling an atensiyon sa mga kanya-kanyang mga ‘personal qualifications’ na hanap sa sarong Santo Papa.
Alagad pig-eenkaminar man kaini an mga mananampalataya na makisumaro sa pangadyi asin idulok sa diyos na tawan nin grasya an mapipiling Santo Papa na lugod nakaugat an saiyang pagmiministro sa kun anong obheto kan Diyos.
Kaya man padagos kaining pig-iimbitaran an gabos na dae sana pag-iasa sa magigin sunod na Santo Papa an gibuhon kan simbahan bagkus pangapodan kaini sa mga Katoliko na makiparte sa pagmimisyon na ipamalas asin maipamate sa kapwa an katukduan asin pagkamoot kan Diyos.
