Sarong pag-atake kan Estados Unidos sa sarong pigtutubudang lunadang pandagat na imbwelto sa kalakalan kan droga sa Caribbean an nagresulta sa pagkagadan kan tolong katawo kan Sabado, sigun ki Pentagon chief Pete Hegseth.
Ini an pinakabagong insidente kan siring kaining klase kan opensiba sa pankinaban na kadagatan.
Nagpadara an Estados Unidos nin mga barkong pandigma sa Caribbean asin nagtalaga nin mga F-35 stealth warplanes sa Puerto Rico, parte kan sarong mahewasang puwersang militar na sigun sa Washington obhetong pugulan an kalakalan kan droga.
Lampas 15 pag-atake kan US sa mga pigtutubudang bangkang imbwelto sa droga sa Caribbean asin Pacific an nagresulta sa pagkagadan kan dae mababa sa 65 katawo kan mga nakalihis na semana, na nagkawsa nin batikos gikan sa nagkapirang lider sa rehiyon.
Sigun sa mga eksperto, an mga pag-atakeng ini, na nagpuon kan enot na parte kan Setyembre, an maikokonsederar na extrajudicial killings maski pa targeton an mga pigbibistong imbwelto sa droga, asin dae pa piglalantad kan Washington an ebidensyang nagpapatotoo na an mga target kaini an totoong imbwelto sa pagpupuslit kan droga na maikokonsederar na huma kan Estados Unidos.
