NAGA CITY – Lugadan an tolong indibidwal makalihis an insidente kan pananaksak sa Brgy. Mabolo, Naga City.
Binisto an mga nalugadan na duwang menor de edad asin sarong 42-anyos na lalaki, gabos residente kan Zone 5 Pagdaicon, Brgy. Mabolo sa nasambitan ng siyudad.
Sa nagunong impormasyon kan Bombo Radyo Naga sa Naga City Police Office napag-araman na nagkaigwa nin mainit na diskusyon sa pag-ultanan kan duwang menor de edad makalihis na magkahilingan sa nasambitan ng lugar.
Katakod kaini, sakto man na nahiling kan 42-anyos na lalaki an duwang menor de edad na an saro sa mga ini an saiyang aki.
Pinurbaran na awaton kan lalaki an duwa alagad bigla na sana soboot pinagsasaksak kan sarong menor de edad an nasambitan ng lalaki.
Sa kasagsagan kan pananaksak, nagibo man maagaw kan aki kan lalaki an patarom gikan sa kapwa menor de edad asin digde naman kaini sinaksak sa tulak.
Sa inisyal na imbestigasyon kan mga otoridad, tolos man na pigdara sa ospital an tolo na nagsapo nin lugad sa manlaen-laen na parte kan saindang mga lawas.
Sa ngunyan, nagpapadagos pa an imbestigasyon kan mga otoridad dapit sa nasambitan ng insidente.
