NAGA CITY- Kinumpirmar ngunian kan Quezon Police Provincial Office (QPPO) na may narekober sa kadagatan na tracking device na pinagtutubudang katakod kan mga magkakasunod na pagkakarekober kan cocaine sa kadagatang sakop kan Quezon asin Camarines Norte.
Sa entrevista kan Bombo Radyo Naga ki PCI Marcelito Platino, tagapagtaram kan Quezon Police Provincial Office (QPPO), sinaysay kaining nakua kan nagkakapirang parasira an sarong tracking device na tulos man na itinurn over sa sainda.
Sigon ki Platino, posibleng nakakabit an nasambitan ng tracking device sa mga nagpapataw pataw na cocaine alagad nasuhay ini kun kaya nasakitan na an mga taong nasa likod kan nasambitan ng mga modus sa paglocate sa mga substance.
Dakula man suboot an pagtubod ninda na sarong grupo sana kan mga sindikato an nasa ibong kan nasambitan ng aktibidad kun sain ginagamit na ngunian an kadagatan sa saindang iligal na transaksyon.
Napag araman na kun pagiiriban ibanon an mga nakuang substance sa duwang probinsya maabot na sa P300-M an kantidad kaini.
Sa ngunian, makalihis marekober an nasambitan ng tracking device, mas pinahigot pa kan mga otoridad an ginigibong imbestigasyon para mabisto an mga taong nasa likod kan nasambitan ng mga pangyayari.
