NAGA CITY- Pigtawan duon kan sarong tricycle driver sa siyudad nin Naga na mayo man soboot magiginibo an saindang lado enkaso magbaba o maglangkaw an pigpapautob na presyuhan sa mga produktong petrolyo.
Sa entrevista kan Bombo Radyo Naga ki Jose Cielos, tricycle driver sa siyudad nin Naga, sinaysay kaini na obligado pa man giraray na magsunod an mga nagpapasada sa mga pigpapautob na presyuhan nin huli ta maski magreklamo dae man ini magigin kasimbagan sa problema.
Sigun pa ki Cielos, maski ano pang agrangay kan mga driver kan mga pampublikong lunadan magigin useless man ini huli ta an nasusunod pa man giraray an mga kompanya kan langis.
Sa ibong na lado, sa presente dae pa man naghahagad nin paglangkaw sa pamasahe an mga tricycle drivers nin huli ta dae pa man soboot kaipuhan sa presente.
Sa ngunyan, abiso na sana kaini sa mga kapwa driver na magin patas sa pigsisingil sa mga pasahero tanganing dae man mabugtak sa alanganin na sitwasyon.
