NAGA CITY- Irido man na pigdalagan sa ospital an pitong persona lunad kan sarong tricycle makalihis na salpukon ini nin sarong SUV sa banwaan nin Bula, Camarines Sur.
Sa nakuang impormasyon kan Bombo Radyo Naga, napag-araman na pigbabagtas kan tricycle na minamaneho ni Jonathan Ballebar, 35-anyos an kalabaan kan tinampo sa barangay
Sagrada sa nasambitang banwaan kan bigla na sana ining mabangga kan SUV na minamaneho man ni German Marinas, 57-anyos.
Huli sa kusog kan pagkakabangga, nagtaob pa suboot an tricycle antes na nagtama sa sarong cyclone wire sa lugar na nagresulta para magsapo nin lugad an driver kaini na si Ballebar siring man an mga lunad kaini na binistong sinda Carlos Febre, 62 anyos, Delfa Febre, 52 anyos, John Lester Prades, 27 anyos, Christine Prades, 26 anyos asin an duwang mga menor de edad na tulos man na pigdalagan sa ospital para maipabulong.
Paramientras man na pigkostudiya kan mga otoridad an driver kan SUV na si Marinas mantang nagpapadagos pa an imbestigasyon kan PNP Bula sa pangyayari.
