Nakatalaang magsagibo nin mahewasang hiro-protesta an simbahan asin nagkapirang civil society groups sa maabot na Setyembre 21, komo parte kan tinaguriang “Trillion Peso March”.
Isasagibo an enot na pagtiripon sa Luneta Park bandang alas-9 nin aga, asin susunodan man kan saro pang paghiro sa People Power Monument sa ganap na alas-2 nin hapon.
Kurahaw kan mga mapartisipar an hustisya asin paninimbagan sa naglalalang isyu kan korapsiyon sa nasyon.
Piglinaw kan mga organisador na dae ninda obhetong pabagsakon an gobyerno, kundi ibusol an mga mahigot na kampanya kontra sa katiwalian.
Nakaapelar na man sinda nin mga permit sa lokal na gobyerno kan Manila asin Quezon City para sa nasambitan ng pagtitipon.
Pig-enkaminar ni Fr. Albert Delvo an gabos kan mapartisipar na magtinir na matoninong asin maglikay sa anuman na kariribokan.
Mientrastanto, pighurot ni Francis Aquino Dee na dae sinda kuntento sa pagbibilog kan Independent Commission on Infrastructure huli ta mayo soboot representantes gikan sa civil society.
Nangapodan ini sa Kongreso na tawan nin “ngipon” an ley tanganing masiertong igwang manimbag sa maanomalyang flood control projects.
Kasuodma, nakumpleto na an komisyon sa pamamayo ni dating SC Justice Andres Reyes asin igwang duwang commissioner na sinda Ex-DPWH Sec Rogelio Singson asin sarong public accountant Rossana Fajardo.
Mantang si Baguio City Mayor Benjamin Magalong an magigin special adviser.Dugang pa ni Dee, pigkakarkulong labi 15,000 katawo an mapartisipar sa nasambitan ng hiro-protesta.
