NAGA CITY – Nanindugan an kampo ni Camarines Norte Governor Edgardo “Egay” Tallado na dae pa tapos an laban kan opisyal sa pagkagobernador.
Ini sa ibong kan desisyon kan Comelec en banc na dagos nang ibasura an kandidatura ni Tallado sa gubernatorial race para sa papaaboton na eleksyon.
Sa entrevista kan Bombo Radyo Naga ki Atty. Dominador Ferrer, saro sa mga abogado ni Tallado, nanindugan ini na mayong katotoohan na final and executory na an nasambitan ng desisyon.
Sigon ki Ferrer, nakatalaang magsunad nin Temporary Restraining Order (TRO) sa Korte Suprema an kampo kan gobernador ngunian na aldaw kunsaen ini na soboot an makakapagsabi kung talagang tapos na an laban ni Tallado.
Sa ibong na lado, nanindugan man si Mia Concordi, pamayo kan Volunteers Against Crime and Corruption (VACC) na pinal na an nasambitan ng desisyon kan Comelec en banc asin kaipuhan na sanang irespeto kan kampo ni Tallado.
Marurumduman na enot nang kinanselar kan Commission on Election (Comelec) 1st Division an kandidatura ni Tallado makalihis paburan an petisyon na pigsunad kan VACC asin kan sarong alkalde sa nasambitan ng probinsya.
Kinwestyon kaya kan grupo an pagsusunad pa nin kandidatura kan gobernador sa ibong kan pgsirbi na soboot kaini nin tolong termino.
Enot digdi, haros magkakasunod na nahampang sa suspensiyon asin dismissal order si Tallado huli sa mga kinakahampang na mga kaso.
