Binatikos ni U.S. President Donald Trump an mga lider kan Europa, na inapod kaining ‘maluluya’ asin nagpatanid na posibleng bawasan kan Estados Unidos an suporta kaini sa Ukraine.
Ginibo kaini an pahayag makalihis soboot mabigo an nagkapirang nasyon sa Europa na kontrolon an migration asin wakasan an halog nang digmaan sa Ukraine.
Komo kasimbagan, nagbwelta si si UK Foreign Secretary Yvette Cooper asin pighurot na nagtitinir na matatag an Europa, orog na sa padagos na paglangkaw kan saindang suporta para sa military defense kan Kyiv kontra sa agresyon kan Russia.
Mientrastanto, padagos man na pigpipirit ni Trump si Ukrainian President Volodymyr Zelensky na magtugot na sa sarong kasunduan sa katoninongan, kaibahan an pagsuko kan nagakapirang teritoryo kan Ukraine, sarong kondisyon na pighahagad kan Russia tanganing mauntok na an saindang pag-atake.
Maduon man na nagtutol si Zelensky asin sinabing maski nuarin dae matao an Ukraine nin teritoryo kaini sa Russia.
Sigun sa saiya, preparado sindang ilahad sa Estados Unidos an mga lakdang para sa posibleng pagtataos kan digmaan, alagad pighurot kaining dae ninda pwedeng talikudan an saindang legal asin moral na obligasyong protehiran an lambang parte kan saindang nasyon, alinsunod sa nag-iiral na ley kan Ukraine asin kan international law.
