Nagpatanid si U.S. President Donald Trump nin matinding ”consequence” kun dae soboot magtugot si Russian President Vladimir Putin sa sarong kasunduan para sa katrangkiluhan sa Ukraine sa saindang meeting sa Alaska ngunyan na Biyernes.
Bagaman dae kaini nilinaw kun anong mga lakdang an isasagibo, sinabi ni Trump na pwedeng kabali digde an mga bagong economic sanctions.
Kasunod kan sarong virtual na pag uulay kaiba si Ukrainian President Zelenskiy asin mga lider kan Europa, pig asegurar ni Trump na mayong magigin kasunduan dapit sa teritoryo kan Ukraine kun mayo an partisipasyon kan nasyon.
Pigsuhestyon man ni Trump an posibilidad kan sarong follow-up meeting kaiba si Putin asin Zelenskiy kun magigin maayos pakarhay an primerong meeting.
Sigun sa saiya, an obheto kan nasambitan ng meeting sa Alaska an ilatag an kahagadan para sa direktang dayalogo kan tulong lado. Sinabi man ni French President Emmanuel Macron asin German Chancellor Friedrich Merz na malinaw an nagin pahayag ni Trump na an mga teritoryo kan Ukraine an dae pwedeng ipagkasundo nin mayo an pagtugot kan Kyiv.
Pig-asegurar man ninda na dapat dugangan an pressure sa Russia kun mayong positibong resulta an pag-uulay sa Alaska. Mientrastanto, pighurot ni Zelenskiy na ginagamit sana ni Putin an huma kan panibagong opensiba tangani manakot antes an summit.
Tinututulan pa man kan Ukraine an.mga kondisyon kan Russia na halion an tropa sa apat na rehiyon asin iuntok na an obhetong maghali sa NATO.
