Pig-anunsyar ni U.S. President Donald Trump na pupunduhon na kan Estados Unidos an mga pag-bomba kontra sa militanteng grupo na Houthi na nasa Yemen, makalihis an 51 aldaw na bakbakan, kasimbagan sa serye kan pag-atake kan mga rebeldeng grupo sa mga barko na nasa Red Sea.
Sigun ki Trump, dae na soboot malaban an rebeldeng grupo kun saen igagalang kan US an saindang pahayag asin pupunduhon na an pagbobomba.
Siring man, mayo pang malinaw na detalyes an pigluwas kan U.S. Defense Department katakod kan tulos na pagbabago kan saindang strategy.
Sigun sa mga opisyal, labi 1,000 target na an pigtamaan sa operasyon, kaibahan an mga kampo, bodega kan armas, asin mga missiles kan militanteng grupo.
Nag-alma man an Houthi sa sinaysay ni Trump asin sinaysay na dae ninda pupunduhon an pag-atake, orog na sa Israel hasta dae soboot natatapos an “agresibong piggibo sa Gaza”.
Mayo man opisyal na reaksiyon an gobyernp kan Israel mapadapit sa pigsaysay kan Houthi rebel.
Mientrastanto, dae man piglinaw ni Trump kun sakop kan kasunduan an padagos na ribayan kan putok sa tahaw kan Houthis asin Israel, na kasuarin sana nambomba sa palupadan kan Israel.
Manunutaran na an mga pag-atake na ginibo kaidto kan Houthi an nagpuon kan taong-2023 kompo suporta sa Hamas sa Gaza.
Marurumduman pigpuonan kan administrasyon ni Biden an pambobomba sa Houthis kan Enero 2024, alagad binatikos ini ni Trump komo “maluyang pag-atake”.
Padagos pa man an mga abiso kan Estados Unidos sa Iran katakod kan suportang pigtatao kaini sa Houthi, alagad pinahimutikan kan State Department na suhay ini sa paramientras na presenteng kasunduan gikan sa Houthi.
