Sinaysay ni US President Donald Trump na nagkasundo an mga lider kan Thailand asin Camboadia tanganing pag-ulayan an sarong untok-putukan, makalihis an tolong aldaw kan marahas na sagupaan na ikinagadan kan labi sa 30 katawo asin pag-ebakwar kan labi sa 130,000 katawo sa rehiyon.
Sa saiyang social media post gikan sa Scotland, iihayag ni Trump na kinaulay kaini an mga pamayo kan duwang nasyon asin pinatanidan sinda na dae sinda makakakua nin kasunduang pangkalakalan sa Amerika kun mapadagos an labanan.
Sigun ki Thailand Acting Prime Minister Phumtham Wechayachai, nagtugot sinda sa prinsipyo kan untok-putokan alagad mawot ninda nin sinserong aksiyon gikan sa Camboadia.
Kasabay kaini, pighagad man kaini ki Trump na enkaminaron an Camboadia na tulos magtugot sa bilateral talks.
Nagpatanid man an United Nations asin ASEAN sa posibleng paglala kan sitwasyon.
Siring man, nagpapadagos an bangayan kan duwang kampo patungkol sa kun sisay an enot na nag-atake, asin parehong pighurot an derechos na ipagtanggol an sadiri.
Marurumdumang nag-ugat an alitan kan duwang nasyon huli sa haloy nang dae pagkakaintindihan sa border kaini, partikularmente na sa mga lugar kun saen yaon an mga sinaunang templong Hindu siring kan Preah Vihear, na dating nagin sentro kan kariribokan kan nakalihis pang taong-2008.
Sa ibong kan anunsiyo ni Trump, mayo pang detalyeng pigluwas katakod sa kun nuarin asin saen mangyayari an pag-uulay kan duwang nasyon.
