Pig-anunsiyar ni US President Donald Trump na nadakop na si Venezuelan President Nicolas Maduro na pigkonsederar kan Amerika komo terorista kaibahan an agom na si First Lady Cilia Flores.
Susog sa sarong statement gikan sa saiyang Truth Social account, pigkumpirmar kan US President na matrayumpo an isinagibong mahewasang strikes kan Amerika kontra sa Venezuela na nagresulta soboot sa pagkaka-arestar kan lider kaini na si President Maduro kaibahan an saiyang agom asin byahe na paluwas kan saindang nasyon.
Pigsaysay kan US President na isinagibo an operasyon sa pakikipagtabangan sa US Law Enforcement.
Basado man sa report kan international media, sinabi kan pirang opisyal na naarestar si Maduro kan US army na Delta Force, an top counter terrorism unit kan US military.
Antes an pag-anunsiyar ni Trump, naenot ng nag-alok an Amerika kan $50 million na pabuya para sa makapagtatao kan impormasyon para sa pagdakop ki Maduro.
Mientrastanto, sigun ki Trump mapaapod ini nin sarong news conference atyan na alas-11:00 nin pagkaaga, oras sa Amerika (11PM, Manila time) sa saiyang Mar-a-Lago residence sa Florida.
Basado man sa sarong Republican Senator, sinaysay soboot ni US Secretary of State Marco Rubio na mahampang si Maduro sa sarong trial sa Amerika katakod sa criminal charges kontra sa saiya asin mayong piglalaomang aksiyon kontra sa Venezuela.
Mientrastanto, sa panig man kan gobyerno kan Venezuela, mayo pang kumpirmasyon dapit sa soboot pagkakaarestar ni Maduro.
Sigun ki Venezuelan Vice President Delcy Rodríguez, mayong aram an gobyerno sa kinamomogtakan ngunyan ni Maduro o ni First Lady Cilia Flores.
Pigdemand man ini sa Amerika na tolos magpahiling nin patunay na buhay sinda Maduro asin First Lady.
Komo tugon man sa isinagibong strikes kan Amerika, pig-anunsiyar ni Venezuelan Defense Minister Vladimir Padrino López an tolos na pagdeploy kan saindang military forces sa bilog na nasyon.
Sa sarong video address, nangapudan ini para sa pagkakasararong pagpugol sa naglalang agresyon kan Amerika kontra sa Venezuela asin sinabing pigsusunod sana kaini an sugo ni Maduro na magdeploy kan armed forces.
Pighayag man kan Defense Minister na padagos an pagkalap kan gobyerno nin impormasyon katakod sa mga nagadan asin nalugadan na indibidwal asin soboot tinamaang civilian areas.
Duon kan Venezuelan official na pupugulan ninda an presensiya kan dayuhang mga tropa sa saindang nasyon. Enot na man nagdeklara an Venezuelan government kan National Emergency kasunod kan strikes kan Amerika.
