Pig-enkaminar ni US President Donald Trump, si Ukrainian President Volodymyr Zelenskiy na punduhon an mga pag-atake sa diesel infrastructure kan Russia.
Ini huli sa paghandal sa negatibong epekto kaini sa pandaigdigang suplay asin sa padagos na paglangkaw kan presyo kan krudo.
An pahayag kan lider kan Estados Unidos kasunod kan sunod-sunod na long-range drone attacks kan Ukraine sa mga oil refinery kan Russia sa nakaaging mga bulan.
An mga pag-atake na ini nagresulta sa dakulang pagbawas sa fuel production asin nagkawsa nin shortages sa laog kan Russia.
Segun ki Trump, dakul pang ibang pwedeng magin target an militar kan Ukraine asin bako dapat an mga pasilidad nin diesel an pinupuntirya.
Alagad, matatag an paninindugan kan Ukraine na lehitimong military targets an mga Russian refinery.
Inirarason ninda na direktang ginagamit an mga ini tanganing pondohan asin suportahan an war effort kan Moscow.
Sa ngunyan, an average price kan diesel sa Estados Unidos suminampa na sa labi anom na dolyar kada galon, mantang ibinaba kan Russia an forecast kaini sa oil production huli sa epekto kan digmaan.
