Pigdeklarar ni US President Donald Trump na tapos na an giyera sa pag-ultanan kan Israel asin Hamas makalihis an duwang taon.
Pig-anunsiyar ini kan US President antes pa an paglunad sa Air force One aircraft pasiring Israel para sa nakatalaan na pagpapalibre kan Hamas sa gabos na mga bihag gikan sa Gaza pirang oras na sana puon sa ngunyan, komo parte kan ceasefire agreement.
Komo karibay, ipapalibre man kan Israel an 250 presong Palestino asin lampas 700 detainees.
Mientrastanto sa pag-abot ni Trump sa Israel, piglalaoman na makikipaghilingan ini ki Israeli Prime Minister Benjamin Netanyahu asin sa mga pamilya kan mga bihag kan Hamas antes maghampang sa Israeli parliament sa Jerusalem.
Makalihis ini, mapasiring an US President sa Egypt tanganing mag-host kaibahan si President Abdel Fattah al-Sisi kan summit on peace in the Middle East, na aatendiran man kan lampas 20 world leaders kaibahan na si British Prime Minister Keir Starmer, tanganing suportaran an plano ni Trump na pagtatapos kan giyera sa Gaza asin pagbubusol kan katuninungan sa Middle East.
Sigun ki Shosh Bedrosian, tagapagtaram kan opisina ni Israeli Prime Minister Benjamin Netanyahu, papalibrehon kan Hamas an gabos na mga buhay na bihag asin ititurn-over sa Red Cross, na mag-aassist sa pagdadara sa mga papalibrehon na Israelis sa border kanIsrael.
Igwa na sanang hasta alas-12:00 nin madaling araw, eastern time, an Hamas tanganing ibwelta an 48 bihag na nasa saindang poder kun saen 20 digde an pigtutubudan na buhay pa.
